Ang Kahalagahan Ng Agham

Ang agham, ito ang sistema ng kaalaman na naghatid sa tao mula sa pagiging sinauna hanggang sa pagiging moderno. Ngunit sa kabila ng ginhawang inihahatid ng agham madami sa atin ang walang interes dito.

Sino bang hindi mag-aakila na parusa ang pag-aaral ng chemistry, ng physics, at lahat ng branches ng science? Sabi nga natin nung tayo'y estudyante pa, ginagamit ba ang science at math ng mga magtataho, tindera, at karpintero? Sabagay may tama tayo doon. Sapagkat madami sa propesyon ngayon ay hindi nangangailangan ng experimentations at equations.

Mahirap at tila walang paggagamitan ang pag-aaral ng agham ngunit sana ay hindi natin makalimutan ang totoong layunin nito. Kailangan natin malaman na ang siyensya ay hindi lamang para sa paggawa ng gadgets, o sa pagusulat ng mga komplikadong formulas, o sa pagpapahaba ng buhay.

Ang agham ay binuo ng tao para sa mas mahalagang dahilan. Iyon ay upang alamin kung paano gumagana at tumatakbo ang mundo. Ang kuryosidad ng tao ay walang tigil. Paano nagsimula ang lahat? Paano nabuo ang buhay? Ano ang purpose ng tao sa mundo? Saan tayo dapat tumungo?

Ang dami ng hirap ang pinagdaanan ng tao para masagot lang ang mga ito at ang produkto, ang mga kaalamang nagbibigay ng malaking pagbabago. Walang sinuman ang may kakayahang baguhin ang mundo kung walang nakakaalam kung paano ito tumatakbo. Kapag mas madami ang kaalaman ng isang tao, mas lumalawak ang kanyang pang-unawa at mas madami syang magagawa.

Marahil nga walang silbi ang agham sa mga magtataho, managers, agents, artista, editors, at sa masa. Ngunit para sa mga taong gustong gumawa ng totoong pagbabago sa sarili, sa kapwa, sa kapaligiran, at sa lipunan, ang agham ang pinakamahalagang instrumento para makamit ito.